Жаңы жыл түнү тамак-аштан ууланганда кандай аракет кылуу керек ?

Жаңы жыл түнүндө алкоголь жана тамак-аштан уулануу эс алуу күндөрүн бузуп, ден соолукка олуттуу зыян келтириши мүмкүн. Бул тууралуу Atribeaute клиникасынын гастроэнтеролог дарыгери Анна Меньщикова «Лента.ру» басылмасына берген маегинде эскертти. Ал майрам күндөрү тамак-аштан ууланганда кандай аракет кылуу керектигин айтып берди.

Дарыгердин айтымында, уулануунун эң негизги коркунучу — кусуу жана ич өтүү учурунда суюктуктун жана туздардын жоголушунан улам пайда болгон суусуздануу. Эгер интоксикациянын белгилери жеңил болсо, жоголгон суюктукту толуктоо жетиштүү. Кусуу же ич өтүү бир жолку болуп, суусуздануунун белгилери байкалбаса, кадимкидейден көбүрөөк суу же өтө таттуу эмес суусундуктарды — мисалы, суюлтулган шире же компот ичүү сунушталат.

Ал эми кусуу же ич өтүү узакка созулса, аракеттердин алгоритми өзгөрөт. Бул учурда дарыканаларда сатылуучу, туздар менен глюкозанын оптималдуу тең салмагын камтыган ооз аркылуу кабыл алынуучу регидратациялык туз эритмелерин ичүүнү баштоо керек. Аларды ар 5–15 мүнөт сайын бир чай кашыктан ичүү зарыл.

Кусуу токтоп, табит ачылган соң кадимки тамак-ашты жесе болот, бирок фастфуддан, куурулган, майлуу тамактардан жана чипсылардан убактылуу баш тартуу керек, анткени алар кайра кусууну козгошу мүмкүн, — деп кошумчалады дарыгер.

Алкоголь менен ууланганда, эгер адам эс-учун жоготпой, бирок кусуп жатса, аны коопсуз абалга (отургузуп же капталына жаткырып) жайгаштырып, таза абага чыгышын камсыз кылуу зарыл. Ошол эле учурда алкоголь интоксикациясынын өзгөчө кооптуу белгилери — дем алуунун бузулушу (сейрек же үзгүлтүктүү дем алуу), муздак, жабышкак, кубарган же көгүш тери, тырышуулар — дароо тез жардам чакырууну талап кылат.

Мындан тышкары, бир жашка чейинки бала, карыя, кош бойлуу аял же оор өнөкөт оорулары бар адам ууланса, ошондой эле ботулизмге же козу карындан ууланууга шек болсо, сөзсүз түрдө тез жардам чакыруу керек.