Шакиранын акысыз концерти 2 миллион көрүүчүнү чогултту
Бразилиянын Копакабана пляжынын жээгинде өткөн Шакиранын акысыз концерти болжол менен 2 миллион көрүүчүнү чогултту, деп билдирди Deutsche Welle.
Бул иш-чара ырчынын дүйнөлүк «Аялдар эми ыйлабайт» аттуу гастролдук туруунун бир бөлүгү болду.
Сахнада ырчы өзүнүн эң белгилүү хиттерин аткарып, кечени BZRP Music Sessions #53 ыры менен жыйынтыктады. Бул ыр ал футболчу Жерар Пике менен ажырашкандан кийин жазылган. Концерт учурунда Шакира: «Биз, аялдар, ар бир жыгылган сайын кайра туруп, дагы да акылдуу болобуз», — деп белгиледи.
Күйөрмандар атактуу пляжга таң эртеден тарта чогула башташкан, алардын көпчүлүгү Латын Америкасынын коңшу өлкөлөрүнөн келишкен. Шакиранын бул концерти жана Bad Bunnyнин Сан-Паулу шаарындагы концерттери Бразилия, Пуэрто-Рико, Колумбия сыяктуу өлкөлөрдүн маданий байланышын жана биримдигин даңазалап жатканын белгилешет.
Рио-де-Жанейронун мэри Эдуардо Кавальеринин маалыматына ылайык, концертке 2 миллион адам катышкан. Бул пляжда мурда Мадонна жана Леди Гага сыяктуу дүйнөлүк жылдыздар да концерт беришкен.
Мындай акысыз концерттер шаар бийлигинин стратегиясынын бир бөлүгү болуп саналат. Алар салынган каражаттан 40 эсеге чейин киреше түшөт деп күтүлүүдө. Туристтердин агымынын эсебинен шаар казынасына кошумча 155 миллион доллар киреше түшөрү болжолдонууда.
