Баткен жана Ош облустарындагы бир катар конуштарга айыл макамын берүү сунушталды
Кыргызстандын Министрлер кабинети Баткен жана Ош облустарындагы бир катар калктуу конуштарды айыл категориясына киргизүүнү караган мыйзам долбоорун коомдук талкууга чыгарды.
Долбоорго ылайык, Баткен облусундагы Бакай, Алты-Адыр жана Орто-Сай, ошондой эле Ош облусундагы Алымбек Датка, Ак-Босого, Биримдик, Достук, Жаштык, Ынтымак, Манас жана Өжөр конуштарына расмий айыл макамы ыйгарылышы мүмкүн.
Демилгечилердин маалыматына караганда, айыл макамын алгандан кийин бул конуштар айыл аймактарынын курамындагы өз алдынча административдик-аймактык бирдиктер болуп саналат.
Мындай чечим жергиликтүү тургундарга өз аймагындагы маселелерди өз алдынча чечүүгө, жергиликтүү жамааттардын башкаруудагы ролун күчөтүүгө, инвестиция тартууга жана өнүктүрүү долбоорлорун ишке ашырууга кошумча мүмкүнчүлүктөрдү түзөт.
Мындан тышкары, жашоочулар бул калктуу конуштарда расмий каттоого турууга мүмкүнчүлүк алышат.
Негиздеме маалымкатында белгиленгендей, аталган конуштардын баары мыйзам талаптарына ылайык айыл категориясына киргизүүгө жооп берет. Макамды жогорулатуу боюнча чечимдер тургундардын жыйындарында кабыл алынып, жергиликтүү кеңештер, райондук администрациялар жана президенттин Баткен жана Ош облустарындагы ыйгарым укуктуу өкүлдөрү тарабынан колдоого алынган.
Бул маселе 2026-жылдын 4-июнунда Министрлер кабинетине караштуу административдик-аймактык түзүлүш жана географиялык аталыштар боюнча ведомстволор аралык комиссия тарабынан жактырылган.
Мыйзам долбоорун кабыл алуу республикалык бюджеттен кошумча каражат бөлүүнү талап кылбайт. Тиешелүү чыгымдарды жергиликтүү бюджеттердин эсебинен каржылоо пландалууда.
