ӨКМ кырсыктардын тобокелдигин азайтуу күнүнө карата видеороликтер сынагын жарыялады
Кыргыз Республикасынын Өзгөчө кырдаалдар министрлиги кырсыктардын тобокелдигин азайтуу күнүнө карата видеороликтер сынагын жарыялады.
Ведомстводон билдиришкендей, сынактын негизги максаты – калктын коопсуздук маданиятын жогорулатуу, өзгөчө кырдаалдардын алдын алуу жана кырсык учурунда туура аракеттенүү боюнча билимдерди жайылтуу.
Сынакка коюлган талаптар:
Видеонун форматы:
узактыгы 3 мүнөткө чейин, туурасынан (16:9) тартылышы керек. Сапаты Full HD, сунушталган формат – MP4.
Видеороликтердин темалары:
жер титирөө учурунда өзүн алып жүрүү эрежелери;
сел жана суу ташкындарынын алдын алуу;
өрт жана суудагы коопсуздук;
балдардын коопсуздугу;
тоодо өзүн алып жүрүү эрежелери;
катуу шамал жана башка жаратылыш кырсыктары учурундагы аракеттер.
Катышуучулар: мектеп окуучулары, студенттер, чыгармачыл топтор жана бардык каалоочулар.
Видеороликти YouTube платформасына жайгаштыруу зарыл. Арыздар жана материалдар 1-октябрга чейин кабыл алынат.
Сынак үч этапта өткөрүлөт: райондук/шаардык, облустук жана республикалык.
Жыйынтыктоочу онлайн добуш берүү 1-октябрдан 7-октябрга чейин ӨКМдин расмий сайтында өтөт.
Эң көп добуш топтогон жеңүүчүлөргө салтанаттуу аземде баалуу сыйлыктар тапшырылат.
Сынак тууралуу толук маалымат жана жобо шилтемеде жеткиликтүү.
