Кой-Таштагы карыялар үйү 2027-жылдын апрелинде ачылат

Аламүдүн районунун Кой-Таш айылында 1 миң орундуу карыялар үйүнүн курулушу 2027-жылдын апрель айында аяктайт. Бул тууралуу президент Садыр Жапаров Чүй облусунун жашоочулары менен жолугушууда билдирди.

​Мамлекет башчысынын айтымында, жаңы социалдык комплекс өлкө боюнча камкордукка муктаж 890 жаранды толук камсыздай алат. Объектке Бишкек шаарындагы жана Ысык-Ата районундагы карылар үйлөрү көчүрүлөт. Тилкеде карыялар үйүнөн тышкары балдар үйү жана 500 орундуу бала бакча курулууда.
​Сөз болуп жаткан комплекс экс-президент Алмазбек Атамбаевдин конфискацияланган мүлкүнүн ордуна салынууда. Мурдагы өлкө башчысынын Кой-Таштагы үйү жана жери соттун чечими менен мамлекеттин менчигине өткөрүлгөн.