Коом
Жолдордогу кароосуз мал — өмүргө коркунуч: Республикада 10 айда 45 жол кырсыгы катталды

Бүгүн, 17-ноябрда Жол кыймылынын коопсуздугун камсыздоо башкы башкармалыгы жолдордо кароосуз калтырылган мал жол кыймылына олуттуу коркунуч жаратарын эскертти.
Малдын кароосуз жүрүшү айдоочулар үчүн чоң тоскоолдук жаратып, кайгылуу кырсыктарга себеп болууда. Расмий маалыматка ылайык, үстүбүздөгү жылдын 10 айында республика боюнча мал-жандыктарынын катышуусунда 45 жол-транспорт кырсыгы катталган. Алардын кесепетинен өкүнүчтүүсү, 5 адам каза болуп, 60 адам ар кандай жаракат алган.
Аймактар боюнча кырсыктардын статистикасы төмөнкүдөй:
- Жалал-Абад облусу — 13 жол кырсыгы катталып, 16 адам жаракат алган.
- Ысык-Көл облусу — 11 жол кырсыгы катталып, 14 адам жаракат алган.
- Чүй облусу — 7 жол кырсыгы катталып, 2 адам каза болуп, 11 адам жаракат алган.
- Ош облусу — 6 жол кырсыгы катталып, 1 адам каза болуп, 10 адам жаракат алган.
- Баткен облусу — 5 жол кырсыгы катталып, 1 адам каза болуп, 4 адам жаракат алган.
- Нарын облусу — 3 жол кырсыгы катталып, 1 адам каза болуп, 5 адам жаракат алган.
Жол кыймылынын коопсуздугун камсыздоо башкы башкармалыгы мал ээлерин жоопкерчиликтүү болууга жана үй жаныбарларын кароосуз калтырбоого чакырат. Бул чаралардын баары жарандардын өмүрүн сактап калууга багытталган.



