Иран Ормуз кысыгына жакындаган аскердик кемелерге катуу жооп кайтарарын эскертти
Ирандын Ислам революциясынын сакчылар корпусу (КСИР) Ормуз кысыгына жакындаган аскердик кемелерге катуу жооп кайтарарын эскертти. Бул тууралуу ирандык Press TV басылмасы жазды.
Маалыматта айтылгандай, «Ормуз кысыгына жакындаган ар кандай аскердик кеме катуу жоопко туш болот». КСИР ошондой эле АКШ жана анын союздаштарынын кандайдыр бир туура эмес кадамы аларды кысыкта «өлүмгө алып келген кыйратуучу кырдаалга» түртөт деп билдирген.
Иран парламентинин төрагасы Мохаммад-Багер Галибаф Тегеран АКШга карата «күзгүдөй» (жооп катары) аракет кыларын айтты. Анын сөзүн Reuters агенттиги келтирди:
«Эгер силер согуш жүргүзсөңөр — биз да согуш жүргүзөбүз, эгер логика менен иш кылсаңар — биз да логика менен жооп беребиз».
Ал ошондой эле АКШ президенти Дональд Трамп тарабынан айтылган жаңы коркутуулар иран элине эч кандай таасир бербей турганын кошумчалады.
Ишемби күнү Иран менен АКШ Исламабад шаарында сүйлөшүүлөрдү баштаган. Буга чейин Трамп эки жумага ок атышууну токтотуу боюнча макулдашууга жетишилгенин билдирген. Бирок жекшемби күнү АКШнын вице-президенти Джей Ди Вэнс узак сүйлөшүүлөр жыйынтыксыз аяктаганын, америкалык делегация келишимсиз кайтарын айткан.
Кийинчерээк Трамп АКШ Ормуз кысыгына кирип-чыккан бардык кемелерди блокадага ала баштарын билдирген. Ал ошондой эле АКШнын деңиз күчтөрүнө Иранга төлөм кылып өткөн кемелерди көзөмөлдөп, кармоону тапшырган.
