Бишкек мэриясы ЖЭБден баш тартууну пландаган жок

Бул тууралуу мэр Айбек Жунушалиев билдирди.

Анын айтымында, жылытуу тутумун борборлоштуруудан арылтуунун алкагында абоненттердин бир бөлүгү өзүнчө от казандарга өткөрүлөт. Бул Энергетиктер жана Куруучулар шаарчаларына, ошондой эле 10-кичи районго тиешелүү болот.

Жаңы от казандарга үнөмдүү жабдуулар орнотулуп, бул жылуулуктун коромжу болушун жана ЖЭБге түшкөн жүктөмдү азайтууга тийиш.

“Эгер мурда ЖЭБ негизинен жылуулук өндүрсө, бүгүн электр энергиясын көбүрөөк иштеп чыгарууда”, — деди Жунушалиев.

Мэр мындай ыкма жылуулук берүүнүн ишенимдүүлүгүн жогорулатарын белгиледи. ЖЭБде авария болгон учурда бүтүндөй шаар жылуулуксуз калышы мүмкүн, ал эми борборлоштуруудан арылтууда абоненттердин бир бөлүгү станциянын ишине көз каранды болбой калат.

Бишкек шаарынын 2050-жылга чейинки башкы планында ЖЭБ-1ди модернизациялоо, райондук от казандарды куруу жана иштеп жаткан жылуулук булактарын реконструкциялоо каралган. Буга чейин ЖЭБдин эскирген жабдуулары жылуулуктун бир бөлүгүн жоготуп, шаар бийлиги жылуулук менен камсыздоонун өздүк наркын төмөндөтүүнүн түрдүү жолдорун карап жатканы маалымдалган.