Баткен облусундагы ооруканаларга жасалма дем алдыруу аппараттары берилди
Баткен шаарынын жана Баткен облусунун неонатология бөлүмдөрүнө беш жасалма дем алдыруучу аппарат берилди. Бул тууралуу Саламаттык сактоо министрлигинен кабарлады.
Билдирүүгө ылайык, жабдыктар БУУнун Өнүктүрүү программасы тарабынан «Кыргызстандын саламаттык сактоо системасын бекемдөө» долбоорунун алкагында сатып алынган. Жабдуунун жалпы наркы 65 миң доллардан ашты.
Медициналык жабдык жаңы төрөлгөн ымыркайларга, анын ичинде оор абалдагы жана дем алуу жетишсиздиги бар балдарга өмүр үчүн маанилүү жардам көрсөтүүгө арналган.
Саламаттык сактоо министри Эркин Чечейбаев БУУнун Өнүктүрүү программасына көп жылдык колдоосу үчүн ыраазычылык билдирип, берилген жабдуу өлкөнүн неонаталдык жардамды күчөтүү жана ымыркайлардын өлүм көрсөткүчүн азайтуу боюнча приоритеттерине толук шайкеш келерин белгиледи.
