Кытай жараны Стамбул-Бишкек авиарейсинде 6700 доллар уурдаган

Сокулук районунда учактын ичинде акча уурдаган чет элдик жаран кармалды. Бул тууралуу Чүй облустук милиция билдирди.

Милицияга арыз менен Орусиянын жараны П.И. кайрылып, андан 7-сентябрга караган түнү Стамбул — Бишкек каттамындагы учакта 6700 доллар уурдалган.

Аталган факт боюнча Кылмыш-жаза кодексинин «Уурдоо» беренесинин негизинде кылмыш иши козголду.

Кылмышка шектүү катары 38 жаштагы Кытай жараны З.Х. кармалды. Тергөө иштери уланууда.