Никеге туруу үчүн ВИЧ жана гепатитке анализ тапшыруу сунушталууда
Кыргызстанда никеге туруучу жарандар үчүн милдеттүү медициналык текшерүүдөн өтүүнү караган мыйзам долбоору коомдук талкууга чыгарылды.
Документке ылайык, никени каттоо медициналык кароодон өткөндүгү тууралуу маалымкат болгондо гана мүмкүн болот.
Бул жөн эле формалдуулук эмес. Мыйзам долбоору В, С жана D вирустук гепатиттерине, ВИЧ-инфекциясына жана жыныстык жол менен жугуучу ооруларга милдеттүү лабораториялык анализ тапшырууну талап кылат.
Азыркы учурда мындай текшерүүлөр ыктыярдуу мүнөздө жүргүзүлөт. Бирок демилгечилер муну саламаттык сактоо системасындагы олуттуу кемчилик деп эсептешет. Алардын айтымында, көптөгөн жарандар өздөрүнүн инфекциялык абалы тууралуу билишпейт, ал эми жугуу учурлары көп учурда никеден кийин аныкталат.
Текшерүүнүн жыйынтыктары медициналык сыр катары сакталат жана жарандардын макулдугу менен гана ачылат.
Мындан тышкары, эгер жубайлардын бири өзүнүн оорусун жашырып койсо, экинчиси сот аркылуу никени жараксыз деп тааныта алат.
Демилге авторлору мындай чаралар инфекциялардын жайылышын азайтууга, үй-бүлө курууда жоопкерчиликти жогорулатууга жана келечек муундардын ден соолугун коргоого жардам берет деп эсептешет.
