Кара-Суу районунда жеңил автоунаа каналга түшүп кетип, төрт адам каза тапты

Бул тууралуу Ош облустук жол кыймылы коопсуздугун камсыздоо башкармалыгы билдирди.

Маалымдалгандай, 20-апрелде саат 13:50лөр чамасында Ынтымак айыл аймагынан Кызыл-Суу кыштагына бараткан жолдо Ак-Терек айылынын 68 жаштагы башчысы өзүнүн Hyundai Accent автоунаасы менен жолдун жээгиндеги каналга түшүп кеткен.

Мунун кесепетинен унаанын ичиндегилердин баары каза тапкан. Айдоочудан сырткары, Жаңы-Арык айылынын 64 жаштагы жетекчиси, Таш-Арык айылынын 50 жаштагы башчысы жана аскердик каттоо боюнча жооптуу 49 жаштагы кызматкери болгон. Алар куран окутууга бараткан.