Шишиктин белгисиз себептери аныкталды
Шишик көп учурда тузду ашыкча колдонуу же сууну аз ичүү менен байланыштырыларын, бирок ага башка факторлор да себеп болушу мүмкүн экенин Анна Педорич билдирди.
Адистин айтымында, шишиктин жашыруун себептеринин бири — организмдеги гормоналдык өзгөрүүлөр. Мисалы, өнөкөт стресс учурунда кортизол гормонунун деңгээли жогорулап, кан тамырлардын дубалынын өткөрүмдүүлүгү күчөйт.
Натыйжада артериялык басымды, кандын көлөмүн жана организмдеги суу балансын жөнгө салган система активдешет. Бул суюктуктун кан тамырлардан ткандарга оңой өтүп, организмден жайыраак чыгышына алып келет. Мунун айынан өзгөчө бетте жана кол-буттарда шишик пайда болот.
Мындан тышкары, шишик вазопрессин гормонунун көбөйүшүнөн да жаралышы мүмкүн. Нутрициолог түшүндүргөндөй, бул гормон бөйрөк аркылуу чыгарылган суюктуктун көлөмүн жөнгө салат. Эгер анын деңгээли жогоруласа, бөйрөк сууну көбүрөөк кармап калып, натыйжада шишик пайда болот.
«Бул процесске жыныстык гормондор да таасир этет. Эстрогендер натрий менен суюктуктун кайра сиңишин күчөтөт. Ошондуктан этек кир циклинин экинчи фазасында көп аялдарда шишикке жакындык байкалат. Себеби эстроген менен прогестерондун деңгээлинин өзгөрүшү кан тамырлардын өткөрүмдүүлүгүнө жана ткандардагы суюктуктун бөлүштүрүлүшүнө таасир берет», — деди Педорич.
