Кыргызстан АКШнын Wabtec компаниясынан 10 заманбап жүк ташуучу локомотив сатып алат
Кыргызстан АКШнын Wabtec компаниясынан ТЭ33АС үлгүсүндөгү 10 заманбап магистралдык жүк ташуучу локомотив сатып алат. Бул тууралуу президенттин маалымат кызматы билдирди.
Аталган келишимге президент Садыр Жапаровдун Нью-Йоркко болгон иш сапарынын алкагында кол коюлду.
Өлкө башчысы 21-сентябрда АКШ президентинин глобалдык өнөктөштүк боюнча атайын өкүлү Паоло Замполли, соода министринин орун басары Уильям Киммит, Экспорттук-кредиттик банкынын төрагасы Жон Йованович жана локомотивдерди чыгарган америкалык Wabtec компаниясынын жетекчилиги менен жолукту.
Анда Садыр Жапаров Кыргызстан АКШ менен соода-экономикалык, инвестициялык байланыштарды кеңейтүүгө жана биргелешкен инфраструктуралык долбоорлорду ишке ашырууга кызыкдар экенин белгиледи. Ошондой эле өлкөдө транспорт инфраструктурасын, анын ичинде темир жол тармагын өнүктүрүүгө өзгөчө басым жасалып жатканын билдирди.
Сүйлөшүүнүн жүрүшүндө “Кыргыз темир жолу” мамлекеттик ишканасы үчүн ТЭ33АС үлгүсүндөгү 10 заманбап локомотивди сатып алуу боюнча келишимге кол коюлду. Ал Кыргызстанга 2027-жылдын аягына чейин жеткирилет.
