Түштүк Кореяда массалык мушташка Кыргызстандын жараны да катышкан

Түштүк Кореянын Пхёнтхэк шаарында 3-октябрдын кечинде чет элдиктердин катышуусунда массалык мушташ болгон. Бул тууралуу 5-октябрда Yonhap агенттиги жергиликтүү полицияга таянып билдирди.

Окуя саат 23:40 чамасында турак жай районундагы балдар паркында болгон. Полициянын видеокөзөмөл жазууларына жүргүзгөн алдын ала талдоосуна ылайык, мушташка болжол менен 15 адам катышкан. Күбөлөр башында катышуучулардын саны 40ка жакын болгонун айтышкан. Айрымдарынын колунда таяктар болгон.

Окуя болгон жерден кетүүгө аракет кылып жаткан учурда 20–29 жаштагы эки эркек кармалган. Алардын бири Кыргызстандын, экинчиси Орусиянын жараны. Экөө тең жаракат алып, анын ичинде сыныктар болгондуктан ооруканага жеткирилген.

Полициянын маалыматына караганда, алар Түштүк Кореяда мыйзамдуу негизде жүрүшкөн.

Кармалгандар мушташка катышканын четке кагып, көчөдө бара жаткан учурда аларга кол салынганын билдиришкен.

The Korea Times жазгандай, полициянын алдын ала версиясы боюнча, окуя эки өлкөнүн жарандарынын топторунун ортосундагы жаңжалдан улам чыккан болушу мүмкүн. Калган катышуучулардын аты-жөнү жана жарандыгы азырынча аныктала элек.

Полиция видеокамералардын жазууларын изилдеп, окуя болгон жерден качып кеткен башка катышуучуларды издеп жатат.