Ысык-Көлдө кечки намаз убагында мечиттен уюлдук телефондорду уурдаган жарандар кармалды -ВИДЕО
Ысык-Көл районунун жана Балыкчы шаарынын милиция кызматкерлери тарабынан биргелишкен иш аракеттеринин натыйжасында, мечиттерден уюлдук телефондорду уурдаган шектүү жарандар кармалды.
Ысык-Көл РИИБне маалымат түшүп, анда Чон-Сары-Ой, Өрнөк, Чок-Тал жана Тамчы айылдарында жайгашкан мечиттерден белгисиз жарандар, намаз учурунда киришип, кийим илүүчү жайда илинип турган кийимдерден уюлдук телефондорду уурдап кеткендиги жөнүндө маалымдалган.
Окуя орун алган жерлерге райондук милициянын тергөө-ыкчам тобу барганда, белгисиз жарандардын кылмыш аракетинен жабыр тарткан 9 жабырлануучу аныкталган. Бардык жабырлануучулардан арыздар алынып, Ысык-Көл райондук милициянын кылмыштардын бирдиктүү реестрине катталып, Кыргыз Республикасынын кылмыш-жаза кодексинин 205-беренесинин (Уурдоо) негизинде кылмыш иштери козголгон. Жалпысынан жабырлануучуларга болжол менен 120 000 сом өлчөмүндө зыян келтирилген.
Көрүлгөн тергөө-ыкчам иш аракеттеринин жүрүшүндө, милиция кызматкерлери тарабынан 2 күндүн ичинде кылмыш жасаган шектүүлөр аныкталып, алар Балыкчы шаарынан колго түшүрүлгөн. Кармалган шектүүлөр Чүй облусунун 19 жаштагы тургуну Б.Н. жана Бишкек шаарынын 17 жаштагы тургуну К.С. булуп чыгышып, алар тергөө кызматына өткөрүлүп берилди.
Учурда тергөө амалдары уланууда.
