CAFA NATIONS CUP-2023: Кыргызстан курама командасы Иран жана Ооганстан менен ойнойт

Футбол боюнча Кыргызстандын курама командасы CAFA Nations Cup турниринин тайпалык оюндарында Афганистан жана Ирандын командалары менен беттешет. Бул тууралуу Кыргыз футбол бирикмесинен билдиришти.

Бүгүн, 26-апрелде Дүйшөмбү шаарында чүчүкулак тартуу аземи өттү. Анын жыйынтыгында Кыргызстандын курама командасы “В” тайпасында Афганистан жана Ирандын командалары менен жайгашты.

“В” тайпасындагы оюндар 10, 13, 16-июнда Бишкекте, “А” тайпасындагы оюндар 11, 14, 17-июнда Ташкентте өтөт.

“В” тайпасындагы оюндардын жүгүртмөсү:

• 10-июнь
Кыргызстан – Афганистан

• 13-июнь
Иран – Афганистан

• 16-июнь
Кыргызстан – Иран

Эки тайпанын жеңүүчүлөрү финалга чыкса, экинчи орунга илинген командалар коло медаль үчүн беттешет.

CAFA Nations Cup турниринде Афганистан, Иран, Кыргызстан, Түркмөнстан, Тажикстан жана Өзбекстандын курама командалары ойнойт.

Беттештер айланма системасы менен бир айлампада өткөрүлөт. Анда тайпалардын жеңүүчүлөрү Ташкент шаарында финалда беттешет. Өз тайпаларында экинчи орунду алган командалар үчүнчү орун үчүн ат салышат.

Билеттер жана трансляция тууралуу маалымат кошумча жарыяланат.