200 миң доллар менен кармалган Талант Мамытов эки айга камакка алынды

Баткен облусунун башчысынын кеңешчиси  Талантбек Мамытов эки айга камалды. Бул тууралуу Баткен облустук соту билдирди.

Акча опузалоого шектүү 11-январга чейин Ош шаарындагы тергөө абагында кармалат.

Белгилүү болгондой, Талантбек Мамытов 23-ноябрда 200 миң доллар пара алып жаткан жеринен кармалган. Ага Кылмыш-жаза кодексинин 208-беренеси («Опузалап талап кылуу») боюнча кылмыш иши козголгон.

Ал «Мекенчил» партиясынын мүчөсү экени маалым.

Президенттин аймактагы өкүлү Абдикарим Алимбаев кеңешчисинин күнөөсүн тергөө аныктарын билдирди.