Россиялык журналисттер Кыргызстанга келишти
Кыргызстанга таанышуу сапары менен Россиянын бир катар жалпыга маалымдоо каражаттарынын өкүлдөрүнөн турган делегация келди. Бул тууралуу президенттик администрация маалымдады.
Билдирүүгө ылайык, сапар президент Садыр Жапаровдун тапшырмасы менен мамлекет башчысынын маалымат катчысы Аскат Алагозов тарабынан кыргыз-орус кызматташтыгын маалыматтык жана гуманитардык багыттарда мындан ары тереңдетүү максатында уюштурулган.
Пресс-турдун программасы эки өлкөнүн медиа коомчулук өкүлдөрүнүн ортосундагы кесиптик байланыштарды кеңейтүүгө, өз ара ишенимди бекемдөөгө жана кыргыз-орус элдеринин мындан ары жакындашуусунда маанилүү роль ойногон коомдук дипломатияны өнүктүрүүгө багытталган.
Кыргызстанда россиялык журналисттер өлкөдөгү ЖМК ишмердүүлүгү, мамлекеттик маалымат саясаты жаатындагы заманбап ыкмалар менен таанышат. Ошондой эле өлкөнүн жаратылышы жана туристтик жайларын камтыган маданий-таанышуу программасына катышышат.
«Мындай аракеттер журналисттердин ортосунда узак мөөнөттүү кесиптик байланыштарды түзүүгө, объективдүү маалыматтык мейкиндикти калыптандырууга, гуманитардык байланыштарды бекемдөөгө жана эки тараптуу кызматташтыкты мындан ары өнүктүрүүгө өбөлгө түзөт. Буга чейин ушундай эле таанышуу сапарлары Казакстан, Өзбекстан, Тажикстан жана Азербайжандын журналисттери үчүн ийгиликтүү уюштурулган», — деп жазылат маалыматта.
Бул иш-чарага Россиянын «Первый канал», «Россия 1», НТВ, RT, «Известия», ММБ, «МИР» ЭТРК, ТАСС, «Россия сегодня», «Интерфакс», «Московский комсомолец», «Комсомольская правда» жана URA.RU. жалпыга маалымдоо каражаттарынын өкүлдөрү катышууда.
