Кырчында абалы начарлаган жаран ӨКМдин тик учагы менен Балыкчыга жеткирилди
Кырчын этномаданий шаарчасында Кыргыз Республикасынын жаранынын ден соолугу кескин начарлап, ал Өзгөчө кырдаалдар министрлигинин (ӨКМ) мобилдик госпиталына медициналык жардам сурап кайрылган.
Кырсыктар медицинасы кызматынын адистери Саламаттык сактоо министрлигинин кызматкерлери менен биргеликте бейтапты алгачкы текшерүүдөн өткөрүп, анын абалына баа беришкен. Шашылыш медициналык жардам көрсөтүү зарылдыгына байланыштуу аны Балыкчы шаарындагы Үй-бүлөлүк дарыгерлер борборуна (ЦОВП) тез арада жеткирүү чечими кабыл алынган.
Бейтапты ыкчам жеткирүү үчүн ӨКМдин тик учагы тартылган. ӨКМдин жана Саламаттык сактоо министрлигинин кызматкерлери жаранды Балыкчыдагы медициналык мекемеге чейин коштоп барып, андан ары дарылоо үчүн дарыгерлерге өткөрүп беришкен.
ӨКМдин тик учактары нөөмөттө турушат жана өзгөчө кырдаалдар жаралган учурда зарыл жардам көрсөтүүгө, ошондой эле жарандарды тез арада эвакуациялоого даяр.
