Бишкекте массалык тамактан уулануу фактысы катталды
Бишкекте кайрадан массалык тамактан уулануу фактысы катталды, деп билдирет Ооруларды алдын алуу жана мамлекеттик санитардык-эпидемиологиялык көзөмөл департаменти.
Алдын ала маалыматтарга ылайык, медициналык жардамга 13 адам кайрылган, алардын 11и стационарга жаткырылган, 2си амбулатордук дарыланууда. Бардык жабыркаган адамдарга зарыл медициналык жардам көрсөтүлүүдө.
Уулангандар тамак-ашты «Буффет» тамактануу жайында жегендиги аныкталды.
Санитардык-эпидемиологиялык кызматтын адистери объектти пландуу эмес текшерүүдөн өткөрүп, продукциянын үлгүлөрүн лабораториялык анализге алышты.
Аныкталган мыйзам бузуулар боюнча протокол түзүлдү. Тамактануу жайына 23 миң сом айып пул салынды жана 11-марттан тартып убактылуу ишин токтотуу тууралуу буйрук берилди.
Эпидемиологиялык иликтөө улантылып жатат.
