2024-жыл үчүн Эсептөө палатасынын отчёту: бюджеттик резервдер жана натыйжасыз пайдаланылган каражаттарга өзүнчө көңүл бурулду
Кыргыз Республикасынын Эсептөө палатасы 2024-жылдагы ишмердүүлүгүнүн жыйынтыгы боюнча жылдык отчётун Кыргыз Республикасынын Жогорку Кеңешине сунуштады. Отчёттун алкагында аудиттик иш-чаралар жана эксперттик-аналитикалык талдоолор аркылуу бюджеттик процесстердеги ачык-айкындуулук, жоопкерчилик жана натыйжалуулук боюнча маанилүү көрсөткүчтөр аныкталды.
Тактап айтканда, Эсептөө палатасы тарабынан 2024-жылы жүргүзүлгөн аудитордук жана аналитикалык иштердин натыйжасында тийиштүү мамлекеттик жана жергиликтүү бюджеттердин киреше бөлүгүн толуктоого мүмкүн болгон кошумча резервдер 88,6 миллиард сом суммасында белгиленди. Бул сумма финансылык тартип бузуулардын категориясына кирбеген менен, тиешелүү органдар жана уюмдар тарабынан так эсептөөлөрдүн, активдүү иш алып баруунун жана чечимдерди өз убагында кабыл алуунун негизинде бюджетке түшө турган каражаттар катары каралат.
Ошондой эле отчётто 29,9 миллиард сом суммасында натыйжасыз жана рационалдуу эмес пайдаланылган бюджеттик жана башка финансылык ресурстар аныкталганы белгиленди. Бул көрсөткүчтөр мамлекеттик каражаттар белгиленген максаттарга жетпестен же башкаруучулук чечимдердин жетишсиздигинен улам туура эмес багытта колдонулганын көрсөтөт. Натыйжалуу башкарууга тоскоол болгон мындай фактылар бюджеттик тартиптин жана мамлекеттик башкаруу сапатынын мындан ары да жакшыртылышы керектигин айгинелейт.
Мындан тышкары, Эсептөө палатасы тарабынан жол-жоболук мүнөздөгү бузуулардын 1 617 фактысы катталган. Бул бузуулар мыйзамдык жана ички тартиптик талаптарды аткарбоо, ошондой эле эл аралык келишимдердин нормаларын сактабастык менен байланышкан.
Жалпысынан, 2024-жыл үчүн даярдалган жылдык отчёт мамлекеттик жана муниципалдык деңгээлдеги ресурстарды башкарууда системалуу көйгөйлөрдүн бар экенин көрсөтүп, бюджеттик процесстерди реформалоо жана көзөмөл механизмдерин күчөтүү зарылдыгын белгилейт. Эсептөө палатасы бул багытта мыйзам чыгаруу жана аткаруу бийлигинин тийиштүү органдары менен тыгыз иш алып барууну улантат.
Отчет Жогорку Кеңештин Бюджет, экономикалык жана фискалдык саясат боюнча комитетинин жыйынында жактырылып, Жогорку Кеңештин жалпы жыйынына чыгарылары белгиленди.
