Рак оорусунан айыктырам деп 5500 доллар алып, качып кеткен Пакистан жараны кармалды
Аламүдүн районунда рак оорусунан айыктырууну убадалап акча алган чет элдик жаран кармалды. Бул тууралуу Чүй облустук милициясынан билдиришти.
Маалыматка ылайык, 24-апрелде Аламүдүн райондук милициясына арыз менен Б.С. аттуу жаран кайрылып, өзүн Сиддик деп тааныштырган адам февраль айында рак менен ооруган баласын медициналык жол менен айыктырып берем деп ишеничине кирип, 5 миң 500 АКШ долларын алып изин жашырып кеткенин билдирип, чара көрүүнү суранган.
Аталган факт Аламүдүн РИИБге катталып, КР Кылмыш-жаза кодексинин 209-беренеси (алдамчылык) менен кылмыш иши козголгон.
Жүргүзгөн ыкчам-иликтөө иштеринин натыйжасында кылмышка шектелип 41 жаштагы С.У.Р. аттуу Пакистандын жараны кармалып, убактылуу кармоо жайына киргизилген.
Учурда тергөө иштери уланууда.
