Эсептөө палатасы Транспорт жана коммуникациялар министрлигинде 7,5 млрд сомдон ашык суммадагы каржылык бузууларды аныктады.
КР Эсептөө палатасы 2023-жылдагы КР Транспорт жана коммуникациялар министрлиги жана анын ведомстволук бөлүмдөрүнө аудитор Б.А. Рыскулиев тарабынан шайкештик аудит жүргүзүп, бир катар каржылык жана процедуралык бузууларды аныктады. Бул тууралуу Эсептөө палатасынан билдиришти.
1. Максатсыз каражаттарды пайдалануу жана мыйзам бузуулар
“Бишкек жүргүнчүлөр автотранспорт ишканасы” тарабынан автобустар сатып алууда бузуулар: XIAMEN GOLDEN DRAGON BUS CO.LTD компаниясынан автобустарды сатып алуудагы бажы төлөмдөрү республикалык бюджеттен максатсыз каржыланган. Жалпысынан, 211,6 млн сомдун 57,2 млн сому пайдаланылбай калган жана бюджетке кайтарылууга тийиш.
“Кыргыз темир жолу” ишканасына капиталдык салымдар боюнча акча каражаттарын берүү: 2022-2023-жылдары жалпысынан 536,5 млн сом которулуп, бирок бул иштер боюнча милдеттемелердин ачык-айкын бөлүштүрүлбөгөнү аныкталды.
Жергиликтүү маанидеги жолдорду каржылоо: Республикалык бюджеттен 143,1 млн сом жергиликтүү маанидеги жолдорду курууга жана оңдоого мыйзамсыз бөлүнгөн.
2. Мамлекеттик сатып алуулардагы мыйзам бузуулар
“Кыргызавтожол” мамлекеттик ишканасынын сатып алуулардагы бузуулары: Жалпысынан 2,5 млрд сомго жол техникалары жана жабдуулар сатып алынган, анын 1,2 млрд сому сатып алуулар жөнүндө мыйзамды бузуу менен ишке ашырылган. Ырастоочу документтердин жоктугунан 1,2 млрд сом негизсиз төлөм катары көрсөтүлгөн.
Конкурстук процедураларды бузуу: Кээ бир подряддык ишканалар талаптарга жооп бербегенине карабастан, тендерлерди утуп алган. Мисалы, “Вега Строй LTD” компаниясына 1098,4 миң сомдук ишти аткарбастан төлөнгөн.
3. Жол фондунун ишмердүүлүгүндөгү кемчиликтер
Фонддун каражаттарын колдонуу: 969,7 млн сом пайдаланылбай калган, ал эми 29,1 млн сом каражат негизсиз пайдаланылган.
Объектилерди каржылоодогу так эместиктер: Жергиликтүү жана шаардык маанидеги жолдорго республикалык бюджеттен 155,7 млн сом мыйзамсыз бөлүнгөн.
4. Кызматкерлердин эмгек акыларын мыйзамсыз көбөйтүү
Министрликтин айрым кызматкерлерине мобилизациялык даярдык үчүн 814,7 миң сом негизсиз төлөнгөн. Мындан тышкары, иштеген жылдары үчүн төлөнгөн айлык акыга үстөк акы 61,1 миң сомго ашыкча төлөнгөнү аныкталган.
5. Материалдык ресурстарды жана мүлктү натыйжасыз пайдалануу
Артыкча жана максатсыз материалдык запастар: 160 миң сомдон ашык баалуулуктар ашыкча топтолгон.
Транспорт каражаттары жана атайын техника: Министрликтин балансында катталбаган автоунаалар жана техникалар мыйзамсыз колдонулууда.
Аудиттин жыйынтыгы боюнча жалпы 7,5 млрд сомдон ашык суммадагы каржылык бузуулар жана мыйзам бузуулар аныкталды. Бул жагдайлар мамлекеттик каражаттарды максатсыз пайдаланууга, ошондой эле министрликтин каржылык жана операциялык ишмердүүлүгүнүн натыйжалуулугунун төмөндөшүнө алып келген.
Аудиттин жыйынтыгы боюнча отчет Эсептөө палатасынын кеңешинде каралып, кабыл алынды. Аудиттин жыйынтыктары укуктук баа берүү үчүн КР Башкы прокуратурасына жиберилди.
