Чачтын түшүүсүнө эмнелер таасир этери айтылды
Адамдын чачы өмүр бою түшүп, кайра өсүп турат жана бул процесс көптөгөн факторлорго, анын ичинде ден соолуктун абалына да байланыштуу экенин дерматовенеролог Кира Кирнас билдирди. Дарыгер чачтын түшүшү өмүргө коркунуч туудурган оорулар менен кандай байланышы бар экенин түшүндүрдү.
Адистин айтымында, чачтын түшүүсүнө стресс, уйкунун жана тамактануунун сапаты, ар кандай органдар менен системалардын оорулары таасир этет. Ошол эле учурда Кирнас өмүргө коркунуч келтирген оору бар учурда чачтын түшүшү эч качан жалгыз жана негизги белги болбой турганын баса белгиледи.
«Көбүнчө чач кан онкологиялык ооруларында, ВИЧте, кургак учукта түшө баштайт. Бирок муну менен катар башка, андан да маанилүү белгилер байкалат. Маселен, дене табынын көтөрүлүшү, катуу жана узакка созулган тери кычышуусу, алсыроо, арыктоо жана салмак жоготуу, бат-баттан суук тийүү, лимфа түйүндөрүнүн чоңоюшу, теридеги өзгөчө тактар же көгөрүүлөр», — дейт дарыгер.
Эгерде чачтын түшүшүнөн башка бейтапта эч кандай даттануу болбосо, ал эми анамнез чогултуу жана кароо учурунда дарыгер шектендирген белгилерди таппаса, анда чач маселеси башка себептерден улам пайда болот, деп белгилейт ал. Акырында адис чачтын сулуулугун жана ден соолугун сактоо үчүн дарыгерге үзгүлтүксүз көрүнүп турууну сунуштады.
