WhatsAppта 13 жашка чейинки балдар үчүн балдар аккаунттары түзүлөт
WhatsApp мессенджеринде 13 жашка чейинки колдонуучулар үчүн балдар аккаунттары пайда болот. Алар ата-энелер тарабынан түзүлүп, толугу менен алардын көзөмөлүндө болот. Бул тууралуу Meta компаниясы билдирди.
Компаниянын маалыматына ылайык, жаңы функция кабарлашуу жана чалууларды чектөөгө багытталган кошумча көзөмөл механизмдери менен коштолот. Демейки жөндөөлөр коопсузураак болуп, балдардын мүмкүнчүлүктөрү атайын чектелет. Бул функция үй-бүлөлөр жана адистер менен биргеликте иштелип чыккан.
Компания билдиргендей, ата-энелердин көпчүлүгү өспүрүм балдарын WhatsApp менен тааныштыруу каалоосун билдиришкен. Ошондуктан 13 жашка чейинки балдар үчүн өзүнчө интерфейси бар аккаунттар түзүлдү.
Мындай аккаунттар:
ата-эне же камкорчу тарабынан түзүлөт жана башкарылат;
ата-эненин аккаунтуна байланышкан бойдон калат;
негизинен чалуу жана билдирүү жөнөтүү функцияларын гана колдонууга мүмкүнчүлүк берет.
Мындан тышкары ата-энелер:
балдары менен ким байланышса болорун;
кайсы топторго кошула аларын;
белгисиз адамдардан келген билдирүү суроо-талаптарын;
аккаунттун купуялык жөндөөлөрүн көзөмөлдөй алышат.
Компания жаңы мүмкүнчүлүк жакынкы айларда этап-этабы менен ишке киргизилерин жана колдонуучулардын пикирине жараша аны мындан ары да өнүктүрөрүн билдирди.
