Дарыгер эртең менен пайда болгон шишиктердин негизги себептерин атады
Дарыгер жана диетолог Марьяна Джутова ден соолуктагы ооруларга байланышпаган эртең менен пайда болгон шишиктердин негизги себептерин айтып берди.
Диетологдун айтымында, ден соолукка байланышпаган шишиктердин эң негизги себеби — тамак-ашта туздун ашыкча болушу. Ал туз көп өлчөмдө туздалган азыктарда жана консерваларда гана эмес, ошондой эле фастфудда, колбасаларда, соустарда жана нан азыктарында да бар экенин эске салды.
«Эгер адам тузду көп колдонсо, бөйрөктөр ага жетиштүү иштей албай калат. Натыйжада организмдеги суюктук ткандарда кармалып калат. Айрыкча бетте, көз кабактарында жана буттарда шишик пайда болот», — деп түшүндүрдү Джутова.
Мындан тышкары, шишиктин пайда болушуна алкоголь да себеп болушу мүмкүн. Анткени алкоголь организмди суусуздандырып, бөйрөктөргө кошумча жүк түшүрөт.
Дарыгер бул көйгөйдүн дагы бир себептери катары рациондо белоктун жетишсиздигин жана сүт азыктарын көтөрө албаган адамдардын аларды колдонушун атады.
