Борбор калаадагы мектептердин мугалимдери актап, сырдоо иштерине тартылбайт
Бул тууралуу Бишкек шаардык кеңешинин социалдык маселелер боюнча туруктуу комиссиясынын жыйынында Бишкек шаарынын вице-мэри Виктория Мозгачева билдирди.
Анын айтымында, мектептерди жаңы окуу жылына даярдоо алкагында жүргүзүлө турган учурдагы оңдоо иштерине — актоо, сырдоо, класстарды жана жалпы пайдалануудагы жайларды тартипке келтирүүгө — шаардык бюджеттен 53 миллион сом бөлүнгөн. Бардык тендердик жол-жоболор толугу менен аяктаган.
Билим берүү мекемелериндеги оңдоо иштери Капиталдык курулуш башкармалыгы тарабынан жүргүзүлөт. Бул максаттар үчүн 2026-жылга 510 миллион сом каралган.
Мындан тышкары, вице-мэр «эмгектин бешинчи чейреги» деп аталган программа алкагында окуучулар мектеп аймактарын көрктөндүрүү иштерине катыша аларын белгиледи. Алар гүлдөрдү сугаруу, короолорду тазалоо жана мектептин айланасын иретке келтирүү сыяктуу иштерди аткарышат.
Мэриянын маалыматы боюнча, мындай практика салттуу түрдө жүргүзүлүп келет жана мектептердин ичиндеги оңдоо иштерине эч кандай тиешеси жок.
