Султан Раев «Жусуп» тасмасын мектеп окуучуларына көрсөтүүнү сунуштады

Жазуучу жана драматург Султан Раев «Жусуп» тасмасын мектеп окуучуларына, студенттерге жана жалпы коомчулукка көрсөтүү керек деп эсептейт. Бул тууралуу ал Facebook баракчасына жазды.

Анын пикиринде, көрүүчүлөр тасманы начар кабыл алган күндө да, ал тарыхка жана улуттук киного сын көз караш менен баа берүүгө түрткү боло алат.

Ал үч маанилүү маселеге токтолду: улуттук киного мамлекеттик каражаттын бөлүнүшү, ата мекендик кино тармагынын абалы жана тарыхый чындык менен көркөм чыгармачылыктын айкалышы.

Жазуучу кыргыз мамлекеттүүлүгүнүн негиздөөчүлөрүнүн бири тууралуу тасма тартууга мамлекеттик каражаттын бөлүнүшүн кинематографисттерге көрсөтүлгөн ишеним катары баалады.

Ошол эле учурда анын айтымында, тасма тармактын мүмкүнчүлүктөрү менен көйгөйлөрүн, анын ичинде режиссуранын, сценарий жазуу чеберчилигинин жана актёрдук мектептин абалын көрсөттү. Драматург тарыхый тасмаларга коюлуучу талаптарга да өзгөчө токтолду.

Анын пикиринде, мындай тасмалар тарыхый тактыкка таянып, ошол доордун атмосферасын чагылдырып, күчтүү драматургияга ээ болушу керек. «Жусуп» тасмасынан ал айрым тарыхый так эместиктерди байкаган.

Бирок көркөм чыгарманы өткөн тарыхтын так көчүрмөсү катары баалоого болбой турганын белгиледи. Анткени көрүүчүлөр тарыхый инсандын образын ар кандай кабыл алышы мүмкүн.

Султан Раев тасманы улуттук кинодо тарыхый эс-тутумду калыптандырууга жасалган алгачкы кадам деп атады. Ошондой эле тасманын жаратуучуларын куттуктап, аны кесипкөй чөйрө менен гана чектелбестен, кеңири аудиторияга көрсөтүүгө чакырды.