Кыргыз-казак ишкерлер кеңешинин жыйынында чек арадагы көйгөйлөр көтөрүлдү
Казакстан менен чек арадагы чечилбеген маселелер экономикалык кызматташтыктын өнүгүшүнө тоскоол болууда. Бул тууралуу Кыргыз-казак ишкерлер кеңешинин жыйынында КР Соода-өнөр жай палатасынын жетекчиси Темир Сариев билдирди.
Ал Кыргызстан менен Казакстандын ортосундагы соода өсүп жатканын, бирок чек арадагы көйгөйлөр ишкерлерге жана жарандарга олуттуу кыйынчылыктарды жаратып жатканын белгилеген.
Сариев Кыргызстандан барган жүк ташуучу унаалардын чек арада узак убакыт кармалып жатканына өзгөчө көңүл бурду. Мунун кесепетинен товарлар бузулуп, жеткирүү кечеңдеп, ишкерлер келишимдеринен кол жууп жатышат.
Ошондой эле ал жарандардын, анын ичинде Ысык-Көлгө бара жаткан туристтердин чек арадан өткөн кыйынчылыктарына токтолду. Мындай жагдай ишкердикке гана эмес, туризм тармагынын өнүгүшүнө да терс таасирин тийгизүүдө.
«Казакстандын Улуттук ишкерлер палатасына ишкерлердин кайрылууларын биргелешип чогултуп, өкмөттөрүбүзгө макулдашылган сунуштарды киргизүүнү сунуштайм. Чек ара бөлүп-жарбай, тескерисинче, боордош элдерди бириктириши керек», — деди ал жыйында.
