Дарыгер жай мезгилинде эмне үчүн ашказан-ичеги оорулары көбөйөрүн түшүндүрдү
Жай мезгилинде ич өткөк, ич катуу жана ашказан-ичеги жолдоруна байланыштуу башка көйгөйлөр менен дарыгерге кайрылгандардын саны адаттагыдай көбөйөт. Бул тууралуу орусиялык гастроэнтеролог Евгения Мельникова билдирди.
Анын айтымында, жайында ич өткөктүн көбөйүшүнүн негизги себептеринин бири – ысыкта азык-түлүктөрдүн тез бузулушу. Азык-түлүктү туура эмес шартта кыска убакытка болсо да сактоо тамактан ууланууга алып келиши мүмкүн.
Дагы бир кеңири тараган себеп – эс алуу учурунда тамактануу тартибинин бузулушу. Тамакты узак убакыт ичпей жүрүү, «швед үстөлүнөн» ашыкча тамактануу, майлуу, куурулган жана ачуу тамактарды көп колдонуу ашказанга, өт баштыкчасына жана уйку безине кошумча күч келтирет.
Мындан тышкары, жайында көпчүлүк адамдар жаңы жашылча-жемиштерди, мөмөлөрдү жана көк чөптөрдү көбүрөөк жей башташат. Бул пайдалуу азыктар болгону менен, рациондо клетчатканын көлөмү кескин көбөйсө, ичтин көөп кетиши, газдын көбөйүшү, ичтин күрүлдөшү жана заңдын бузулушу сыяктуу көйгөйлөр жаралышы мүмкүн.
Дарыгердин айтымында, дагы бир коркунуч фактору – жетиштүү өлчөмдө суюктук ичпөө. Ысык аба ырайында организм тер аркылуу көбүрөөк суу жоготот. Эгер жоголгон суюктуктун орду толтурулбаса, ичегинин иштеши бузулуп, ич катуунун пайда болуу коркунучу жогорулап, тамак сиңирүү начарлайт.
