Нарын облусунун Кочкор районунда калкты тейлөө борбору ачылып, алгачкы кызматын 104 жаштагы кемпирге көрсөттү. Бул тууралуу Мамлекеттик каттоо кызматынан кабарлашты.
Билдирмеге ылайык, улгайган аялдын 1994-жылкы паспортун алмаштыруу үчүн калкты тейлөө борборунун мобилдик тобу анын жашаган үйүнө барып, документтерин кабыл алган.
“Алгачкы кардарлардын бири Шамшия Шалпыкова 1916-жылы туулуп, өмүр бою Кочкор районунда жашаган. Анын жаш курагы эске алынып, бардык кызматтар акысыз көрсөтүлдү”, — деп айтылат маалыматта.
Мындан сырткары, калкты тейлөө борбору 1-топтогу майып, 29 жаштагы Жолдубай Төлөмүш уулунун паспортун алмаштырууга да көмөктөшкөнү айтылды.
