Такиров: Тигүү цехтеринин ээлери үчүн кесипкөй бухгалтерди жалдоо абдан маанилүү
Тигүү цехтеринин ээлери үчүн кесипкөй бухгалтерди жалдоо абдан маанилүү, анткени бүгүнкү күндө бардык документтер жана сертификаттар электрондук системалар аркылуу гана берилет. Бул тууралуу бүгүн өткөн маалымат жыйынында Кыргызэкспорт борборунун директору, Экономика жана коммерция министрлигине караштуу борбордун жетекчиси Урмат Такиров билдирди.
Анын айтымында, санариптик сервистерде туура иштөө үчүн ишкерлерге сөзсүз түрдө бухгалтерди штатка алуу шарт эмес — адисти жарым ставка менен же алыстан иштөө тартибинде тартса да жетиштүү.
Эксперт тигүү цехтеринин жетекчилери мыйзам талаптарын жана уруксат берүүчү документтерди алуудагы негизги кадамдарды өздөрү да түшүнүшү керек экенин белгиледи. Бул мыйзам бузуу учурларын алдын алууга жардам берет.
Мыйзамдуу сертификаттарды алуу үчүн Урмат Такиров ишкерлерге аккредитацияланган органдарга гана кайрылууну сунуштады. Алардын катарына Кыргыз аккредитация борбору, Кыргызстандарт жана алардын аймактык филиалдары кирет.
«Мамлекеттик органдарга суроо берүүдөн коркпош керек. Бул сиздин бизнесиңиз, анын ийгиликтүү болушу үчүн бардык иштер туура жасалышы зарыл», — деди ал.
Эске салсак, Кыргызстандын тигүү тармагы Россия тарабынан көзөмөлдүн кескин күчөтүлүшүнөн улам олуттуу кризиске туш болгон. Кыйын кырдаал өткөн жылдын сентябрь айынан бери байкалууда.
Кыргыз Республикасынын Экономика жана коммерция министрлиги билдиргендей, учурда россиялык маркетплейстерге товар жеткирүүгө байланышкан маселелер чечилген. Бирок түз келишимдер менен иштеген экспорттоочулар жаңы эрежелерге ылайык иштөөгө аргасыз болушат.
2026-жылдын 1-апрелинен тартып тесттик режимде товарды күтүүнү тастыктоо системасы — СПОТ (система подтверждения ожидания товара) ишке кирет. Бул система Россиядагы жүк алуучулардан документтерди милдеттүү түрдө каттоону жана камсыздоо төлөмүн киргизүүнү талап кылат.
