Москвада КМШ өлкөлөрүнүн коопсуздук органдарынын өкүлдөрү терроризмге каршы күрөштү талкуулашты
Москвада КМШга мүчө 9 мамлекеттин коопсуздук органдарынын жана атайын кызматтарынын өкүлдөрүнүн жолугушуусу өттү. Анда терроризмге жана экстремизмге каршы күрөшүү маселелери талкууланганын МИР 24 агенттиги билдирди.
Оор коркунучтардын бири эл аралык террористтик уюмдар дагы деле иштеп жаткан Ооганстандан келип чыгууда. Коопсуздук органдары ал жакта баңгизаттарды өндүрүү көбөйгөнүн белгилешет, аны сатуудан түшкөн киреше, башка нерселер менен катар терроризмди колдоого жумшалат. КМШнын атайын кызматтарынын биргелешкен чараларынын аркасында кырдаал тийиштүү көзөмөлгө алынды.
«Операциялык кырдаал өзгөрүүдө, жаңы чакырыктар жана коркунучтар пайда болууда, чет элдик согушкерлер менен террористтердин жаңы ыкмалары пайда болууда. Ал эми биз сааттарды синхрондоштуруу жана жалпы баа берүүлөрдү иштеп чыгуу, ошондой эле азыркы этапта терроризмге каршы туруу боюнча позитивдүү тажрыйба алмашуубуз керек», — деди КМШга мүчө мамлекеттердин антитеррордук борборунун жетекчиси Евгений Сысоев.
Жыйында КМШнын Антитеррордук борбору менен Чек ара аскерлеринин командачылар кеңешинин координациялык кызматынын ортосундагы кызматташуу жөнүндө келишимге, ошондой эле Уюшкан кылмыштуулукка каршы күрөштү координациялоо бюросу менен кызматташуу боюнча меморандумга кол коюлду.
