БМУнун сурамжылоосунун жыйынтыгы: Кыргызстандыктардын көбү президенттин саясатын жана уюшкан кылмыштуу топторго каршы күрөштү колдойт
2023-жылдын 24-октябрынан 28-октябрына чейин БМУнун Коомду изилдөө борборунун социологдору кыргызстандыктардын коомдук пикирин дагы бир сурамжылоо жүргүздү.
Социологиялык сурамжылоо жарандардын ички саясаттын актуалдуу маселелерине жана азыркы эл аралык кырдаалга мамилесин изилдөөгө арналды. Тактап айтканда, респонденттерге акыркы убакта өлкө жетекчилигинин уюшкан кылмыштуулукка каршы күрөшүүдөгү чечкиндүү аракеттери, алардын ишеним деңгээли жана саясатчылардын ишмердигине баа берүүсү, ошондой эле дүйнөдөгү эл аралык чыр-чатактар боюнча суроолор берилди.
Социологиялык изилдөөгө 7 облуста жана Бишкек шаарында жашаган 1518 адам катышты.
Сурамжылоого катышкан кыргызстандыктардын басымдуу көпчүлүгү Кыргыз Республикасынын Президентинин тышкы саясат тармагындагы ишине оң баа беришет. Ошентип, сурамжылоонун жыйынтыктары көрсөткөндөй, респонденттердин дээрлик 70%ы Кыргыз Республикасынын Президенти С.Н.Жапаровдун тушунда өлкөнүн эл аралык бедели жана башка мамлекеттер менен эл аралык мамилелери «жакшырды» деп эсептейт.
Коом уюшкан кылмыштуу топтор менен күрөшүү боюнча чечкиндүү чараларды колдойт
Сурамжылоонун жыйынтыктары көрсөткөндөй, респонденттердин 61%дан ашыгы өлкө жетекчилигинин уюшкан кылмыштуу топторго каршы күрөштөгү чечкиндүү аракеттерин колдошот.
