Бишкек мэриясы Киев көчөсүн реконструкциялоо концепциясынын бир бөлүгүн тааныштырды
Бишкек мэриясы Киев көчөсүн реконструкциялоо боюнча концепциянын бир бөлүгүн коомчулукка сунуштады. Долбоор жөө адамдар үчүн ыңгайлуу мейкиндикти түзүүнү, коомдук транспорт үчүн атайын тилкелерди жана эки тараптуу веложолду курууну карайт.
Сунушталган материалдарга ылайык, көчөдө автобустар үчүн эки өзүнчө тилке уюштурулуп, ошондой эле эки тараптуу өзүнчө веложол салынат. Бул долбоор шаардык транспорттук инфраструктураны жаңылоого багытталган кеңири өзгөрүүлөрдүн бир бөлүгү экени белгиленди.
Эске салсак, Бишкектин бекитилген Башкы планында Киев көчөсү жөө адамдар үчүн аймак катары көрсөтүлгөн. Мындан тышкары, документте бул көчө аркылуу трамвай линиясын куруу да каралган.
Долбоор боюнча коомдук талкуу 5-июнда саат 17:00дө Чүй проспекти, 168а дарегинде жайгашкан «Тунгуч» театрында өтөт.
Жолугушуунун жүрүшүндө адистер реконструкциялоо концепциясын тааныштырып, сунушталган өзгөрүүлөр, долбоордун максаттары жана күтүлгөн жыйынтыктары тууралуу маалымат беришет. Презентациядан кийин шаар тургундары суроолорун берип, өз сунуштары менен пикирлерин билдире алышат.
