Эми Бишкекте сөөк чучугун трансплантациялоо жүргүзүлөт
Эми Кыргызстанда сөөк чучугун трансплантациялоо үчүн чет өлкөдөн жабдуу издөөнүн зарылдыгы болбойт. Бул тууралуу Эне жана баланы коргоо улуттук борборунун балдар онкологиясы бөлүмүнүн башчысы Султан Стамбеков билдирди.
Анын айтымында, өткөн жылы өлкөдө балдарга сөөк чучугун трансплантациялоо боюнча толук кандуу программаны түзүү максаты коюлган. Алгачкы операция кесиптештердин жабдуусун колдонуу менен жасалган, бирок заманбап өз жабдуусу жок бул тармакты өнүктүрүү мүмкүн эмес болчу.
Долбоорду колдоо өтүнүчү менен дарыгер «Ас-Сафа» кайрымдуулук фондуна кайрылган. Фонддун президенти Ибрагим Мальсагов жана Кувейттен келген шейхтин колдоосу менен керектүү жабдууларды сатып алуу каржыланды.
Натыйжада борборго заманбап аферез аппараты жана экстракорпоралдык фотоферез аппараты алынып келди. Бул жабдуулар Кыргызстанда сөөк чучугун трансплантациялоону өз алдынча жүргүзүүгө мүмкүнчүлүк берет.
Мындан тышкары, экстракорпоралдык фотоферез трансплантациядан кийинки «трансплантат кожоюнга каршы» реакциясын дарылоодо, ошондой эле бөйрөк, боор, жүрөк жана өпкө көчүрүлгөндөн кийинки өнөкөт четке кагууну жана айрым оор аутоиммундук ооруларды дарылоодо кеңири колдонулат.
