Ирандык ырчы Парасту Ахмадиге 74 камчы жазасы күчүндө калды
Тегерандын апелляциялык соту белгилүү ирандык ырчы Парасту Ахмадиге чыгарылган өкүмдү күчүндө калтырды. «Би-би-синин» маалыматына караганда, ырчы эки жыл мурда коомдук жайда хижабсыз чыккандыгы үчүн 74 жолу камчы жазасына тартылат.
Ырчынын адвокаттарынын билдиришинче, сот мурунку инстанциянын чечимин сот отурумун өткөрбөстөн тастыктаган. Жактоочулар мындай чечимдин негизги максаты келечекте ушундай учурларга жол бербөө болушу мүмкүн деп эсептешет. Ошол эле учурда алар концерт өткөрүүнү кылмыш деп эсептебей турганын айтып, жаза өтө катаал экенин белгилешти. Алардын пикиринде, айып пул же башка жеңилирээк чаралар колдонулса болмок.
Парасту Ахмади жана анын тобунун концерти 2024-жылдын 11-декабрында өткөн. Концерт ырчынын YouTube каналында түз эфирде көрсөтүлгөн. Ал кара түстөгү, ийиндери ачык көйнөк кийип, чачын жайып, хижабсыз ырдаган. Түз эфирди биринчи суткада болжол менен 500 миң адам көргөн, ал эми 2026-жылдын жай айларына карата көрүүлөрдүн саны 3 миллионго жакындаган.
Ирандын мыйзамдарына ылайык, аялдардын коомдук жайларда хижабсыз жүрүүсүнө жана эл алдында соло ырдоосуна чектөөлөр коюлган.
Ырчынын тобунун мүчөлөрү да камчы жазасына тартылган. Мындан тышкары, алардын баарына, анын ичинде Парасту Ахмадиге да, эки жыл бою Ирандан чыгууга жана чыгармачылык менен алектенүүгө тыюу салынган.
