Туздоого ылайыктуу бадыраң менен помидорду кантип тандоо керек

Адистердин айтымында, туздоого арналган жашылчалар бекем, тыгыз жана көлөмү кичине болгону жакшы.

Туздоо үчүн эң ылайыктуу бадыраңдар — кабыгы жука, кара тикенектери бар жана бетинде бүдүрлөрү даана көрүнгөндөр. Алардын эң жакшы өлчөмү 7–12 сантиметр.

Помидорду да кылдат тандоо керек. Ал эттүү, тыгыз, жагымдуу жыты бар жана бышып өтүп кетпеген болушу зарыл.

Помидордун туздоого жарамдуулугун текшерүүнүн бир жолу — үстүнө кайнак суу куюу. Эгер кабыгы жарылбаса, мындай помидорду бүтүн бойдон консерва кылууга болот.

Адистер жашылчаларды алдын ала даярдоо да маанилүү экенин белгилешти. Бадыраңды туздоодон мурун 3–5 саат муздак сууга салып коюу сунушталат. Ал эми помидордун сабагы бекитилген жерин тиш чукугуч менен сайып коюу керек.