Психолог смартфонго көз карандылыктын негизги белгилерин атады
Психолог Николас Кардарас смартфонго көз карандылыкты кантип аныктоого болорун айтып берди.
Адистин айтымында, мындай көз карандылыктын белгилерине телефондон алыс болгондо дүрбөлөңгө түшүү же тынчсыздануу, сүйлөшүп жаткан учурда же жаңы ойгонгондо эле телефонду текшерүүгө болгон күчтүү каалоо, ошондой эле чөнтөктө телефон дирилдеп жаткандай жалган сезимдин пайда болушу кирет.
Мындан тышкары, адамдын чат-ботторго жана жасалма интеллектке ашыкча ишенип, өз алдынча ой жүгүртүү жөндөмүнүн начарлашы да көйгөйдүн белгиси болушу мүмкүн экенин белгиледи.
Көз карандылыктан арылуу үчүн психолог жок дегенде бир күндү телефонсуз өткөрүүнү сунуштады. Социалдык тармактарды тынымсыз карап отуруунун ордуна сейилдөөгө чыгып, достор менен баарлашып же дофаминдин бөлүнүп чыгышын табигый түрдө стимулдай турган башка пайдалуу иштер менен алектенүүгө кеңеш берди.
Адистин айтымында, скроллингсиз өткөрүлгөн бир эле күн мээнин жана борбордук нерв системасынын калыбына келишине оң таасирин тийгизиши мүмкүн.
