Психолог баланы мектепке даярдоодо кетирилген негизги каталарды эскертти
Үй-бүлөлүк жана балдар психологу Светлана Глагола жаңы окуу жылынын алдында ата-энелердин тынчсыздануусун балдар жакшы сезерин айтып, баланы мектепке даярдоодо кетирилген негизги каталарды атады.
Анын айтымында, окуу жылы башталар алдында көптөгөн ата-энелер мүмкүн болуучу көйгөйлөрдүн баарын алдын ала чечүүгө аракет кылып, ашыкча тынчсызданышат. Мындай учурда өзүнүн сезимдерин түшүнүп, кабыл алуу маанилүү.
«Балдар ата-энесинин маанайын жана коркууларын абдан жакшы сезишет. Эгер сиз тынчсызданып жатсаңыз, бул тууралуу балаңыз менен ачык сүйлөшүңүз. Өз коркууларыңызга ашыкча токтолуунун кереги жок, бирок үй-бүлөнүн көнүмүш жашоо тартиби өзгөрөрүн түшүндүрүү маанилүү», — деди психолог.
Адис ата-энелер кетирген негизги каталардын бири катары баланын күн тартибин кескин өзгөртүүнү белгиледи. Мисалы, баланы дароо эле эрте уктоого көндүрүүгө аракет кылуу анын уктай албай, эртең менен чарчап ойгонушуна алып келиши мүмкүн. Ошондуктан күн тартибин мектеп башталганга эки жума калганда акырындык менен өзгөртүү сунушталат.
Ошондой эле ата-энелер баланы мектеп же мугалимдер менен коркутпашы керек. Эксперттин пикиринде, балада мектепке карата жыл бою нейтралдуу мамиле калыптандырылып, анын жакшы жана кыйын жактары түшүндүрүлүшү зарыл.
Окуу жылы башталар алдында ата-энелер мектепке байланыштуу позитивдүү нерселерге көңүл бурушу керек. Бул балага жаңы шарттарга көнүүгө жардам бере турган жакшы эмоциялардын топтолушуна шарт түзөт.
Мындан тышкары, мектепке кийим-кече сатып алууда баарын «өсүп кетет» деп чоң өлчөмдө алууга аракет кылуунун кереги жок. Эң негизгиси — бала өзүн ыңгайлуу жана ишенимдүү сезиши. Болбосо ал сырткы көрүнүшүнөн уялып, мектепке баргысы келбей калышы мүмкүн.
