Бала эмизген энелердин катуу диета кармоого зарылдыгы жок
Эгер бала дени сак болуп, дары-дармек кабыл албаса, эмизген эне катуу диета кармоого муктаж эмес. Аял кош бойлуу кезинде көнүп жеген тамактарын эмчек эмизүү мезгилинде да жей берсе болот. Бул тууралуу Улуттук энени жана баланы коргоо борборунун жаңы төрөлгөн ымыркайларды реанимациялоо бөлүмүнүн башчысы, медицина илимдеринин кандидаты Элеонора Жумалиева «Биринчи радионун» эфиринде билдирди.
Анын айтымында, медициналык каршы көрсөтмөлөр болбосо, аял кадимки тамактануу режимин уланта алат. Буга ачуу тамактар да кирет. Эгер аял кош бойлуу кезинде ачуу тамактарды үзгүлтүксүз жеп жүргөн болсо, эмизүү учурунда да жей берсе болот. Бирок алкоголдук ичимдиктерге тыюу салынат.
Дарыгер төрөттөн кийин тамактанууну кескин өзгөртпөөгө кеңеш берди. Мисалы, кош бойлуу кезинде ачуу тамакты дээрлик жебеген аял төрөттөн кийин аны кескин көбөйтсө, балада жагымсыз реакциялар жаралышы мүмкүн.
«Эне кош бойлуу кезинде өзү көнүп жеген бардык тамактарды жей алат», — деди Жумалиева.
Ошондой эле эмизген аял суюктукту жетиштүү ичиши керек. Ал өзү көнүп ичкен суусундуктарды пайдалана алат. Ал эми тамак-ашка кандайдыр бир чектөө коюу медициналык негизде гана болушу керек. Эмчек эмизип жаткандыктан эле автоматтык түрдө катуу диета кармоонун зарылдыгы жок.
