Рамзан Кадыров 207 колуктунун калыңына акча бөлдү
Чеченстандын башчысы Рамзан Кадыров, COVID-19 пандемиясынын айынан финансылык проблемалары чыгып калган күйөө балдарга 207 колуктунун калыңына акча бөлгүлө, деп тийиштүү мекемелерине тапшырма бергени тууралуу аймактын мусулман дини боюнча башкармалыгынан билдиришти. Күйөө балдардын үй-бүлөөлөрү никелешүү расмисине ар бири 50 миң рублдан акча ала турган болушту. Бул тууралуу 8-июнда “Коммерсантъ” жазып чыкты.
«Республиканын башчысы Рамзан Кадыровдун тапшырмасы боюнча, баардык райондордон үйлөнүүнү каалаган, бирок финансылык кыйынчылыкка тушуккандардын тизмеси алынган. Ахмат-Хаджы Кадыровдун аймактын фонду, түзүлгөн тизме боюнча 207 колуктунун калыңына каражат бөлдү», — деп айтылган билдирүүдө («РИА Новостиден» алынган цитата).
Чеченстанда апрелден тартып коронавируска байланыштуу исламдын канондору менен никеге турууга тыюу салынган. Тыюу 25-майдан баштап алынды, бирок үйлөнүү үлпөтүнө чек коюлду. Муфтияттан билдиргендей, колуктуну алып келүү үчүн эки гана машина бара алат.
Abal.kg
