Бишкекте II Эл аралык UmutDoc документалдык кино фестивалы өтөт
10–14-сентябрь күндөрү Бишкекте режиссёр-документалист Альгимантас Видугиристин элесине арналган II Эл аралык UmutDoc документалдык кино фестивалы өтөт.
Фестивалдын негизги иш-чаралары «Ала-Тоо» кинотеатрында жана OloloErkindik аянтчасында уюштурулат. Программада толук метраждуу жана кыска метраждуу документалдык тасмалардын көрсөтүлүшү, тасма авторлору менен жолугушуулар, мастер-класстар, кесиптик талкуулар, питчингдер жана кинодолбоорлордун презентациялары камтылган.
Фестивалдын ачылышы 10-сентябрда саат 18:30да «Ала-Тоо» кинотеатрында өтөт. Көрүүчүлөргө Альгимантас Видугиристин «Нарынский дневник» жана режиссёр Талип Ибрагимовдун «Альгимантас Видукыргыз — исповедь жены кинорежиссера» тасмалары көрсөтүлөт.
Кийинки күндөрү бул жерде сынактык программа, Видугиристин тасмаларынын ретроспективасы жана сынактан тышкаркы «Ракурс» программасы өтөт.
Жеңүүчүлөр «Мыкты тасма» жана «Мыкты режиссура» номинациялары боюнча аныкталат. Мындан тышкары, калыстар тобунун атайын сыйлыгы жана көрүүчүлөрдүн тандоосу боюнча сыйлык тапшырылат.
New York Film Academy Kazakhstan колдоосу менен фестивалдын байге фонду толукталып, жалпы баасы 80 миң долларды түзгөн сыйлыктар каралган.
Ошондой эле студенттик калыстар тобу түзүлөт. Анын мүчөлөрү кесипкөй адистер менен бирге сынакка катышкан тасмаларды баалашат.OloloErkindik фестивалдын билим берүү жана кино индустриясына арналган программасынын борбору болот. Бишкекке DocsBarcelona, Berlin Film Residencies, Cannes Docs, Stranger Films Sales, 3Boxmedia, LuFilms жана New York Film Academy Kazakhstan уюмдарынын эксперттери келишет.
Казакстандык режиссёр Канат Бейсекеев жеткиликтүү документалдык кино тартуу боюнча мастер-класс өткөрөт.
Документалисттердин долбоорлору Project Pitching жана Project Showcase аттуу эки секцияда көрсөтүлөт. Катышуучулар эксперттердин баасын алып, эл аралык копродукцияга чыгуу, чет өлкөлүк аянтчаларда долбоорлорун жайылтуу жана каржылык колдоо мүмкүнчүлүгүнө ээ болушат.
Быйыл биринчи жолу Algimantas Vidugiris Award сыйлыгы тапшырылат. Ал UmutDoc фестивалынын сынактык программасына кирбейт. Сыйлыктын жеңүүчүсүн өзүнчө эл аралык калыстар тобу аныктайт. Сыйлык режиссёрдун чыгармачылык мурасын сактоо жана жайылтуу максатында VidugirisFilm долбоорунун алкагында негизделген.
Фестивалдын негизги максаттарынын бири — Борбор Азиянын документалдык киносунун эл аралык рынокко чыгышына мүмкүнчүлүк түзүү.
UmutDoc фестивалынын бардык иш-чараларына кирүү акысыз.
