Кыргызстандын кыз-келиндер күрөшү боюнча курама командасынын мүчөсү Айпери Медет кызы Бишкекте өтүп жаткан Азия чемпионатында алтын медаль утту.
Ал 76 кг чейинки салмак ченинде 1/4 финалдан баштап катышып, анда индиялык Прия Прия аттуу спортчуну 3:1 эсебинде жеңди.
Жарым финалда казакстандык Элмира Сыздыкованы 5:1 эсебинде артта калтырып, финалга чыкты.
Ал эми чечүүчү финалдык беттеште кытайлык спортчуну 10:7 эсебинде ишенимдүү утуп, алтын медаль тагынды.
Ошентип Айпери Медет кызы өз карьерасында Азиянын эки жолку чемпиону аталды.
Спортчу буга чейин 2023-жылы Кытайдын Ханчжоу шаарында 45 өлкөнүн катышуусунда өткөн XIX жайкы Азия оюндарында биринчи орунду ээлеген.
Белгилей кетсек, ушул тапта “Бишкек Арена” муз аянтчасында спорттук күрөштүн түрлөрү боюнча Азия чемпионаты өтүүдө.
- 11-12-апрель күндөрү эркин күрөш,
- 13-14-апрель кыз-келиндер арасында,
- 15-16-апрель грек-рим күрөшү боюнча беттештер орун алат.
