Министрлик Сулайман-Тоону ЮНЕСКОнун тизмесинен чыгаруу идеясын колдобойт
Кыргызстандын Маданият, маалымат жана жаштар саясаты министрлиги Ош шаарындагы ыйык Сулайман-Тоо тоосуна асма жол куруу сунушун колдобойт. Бул тууралуу ведомствонун жетекчиси Мирбек Мамбеталиев журналисттерге билдирди.
Анын айтымында, асма жол куруу демилгеси шаар мэринин жеке сунушу. Бирок мындай чечимдерди кабыл алууда өлкөнүн колдонуудагы мыйзамдарын жана Кыргызстандын маданий мурастарды сактоо боюнча эл аралык милдеттенмелерин эске алуу зарыл.
«Терс жооп берилет», — деди Мирбек Мамбеталиев. Ал мыйзамдар жана эл аралык талаптар бар экенин, аларды сактоо керектигин белгиледи.
«Бул ыйык тоо, ошондуктан биз аны сакташыбыз керек», — деди министр.
Анын пикиринде, Сулайман-Тоого «асма жол куруу таптакыр жол берилгис».
Мирбек Мамбеталиевдин айтымында, тоодо реконструкция жана реставрация иштерин жүргүзүү пландалууда. Дүйнөлүк банк Сулайман-Тоону реконструкциялоого жана реставрациялоого болжол менен 12 миллион сом бөлгөн.
Маданият министрлиги ошондой эле Сулайман-Тоонун буфердик аймагынын чектерин кайра карап чыгуу боюнча иштерди жүргүзүүдө. Кыргызстан анын аянтын кыскартуу маселеси боюнча ЮНЕСКОго расмий кайрылуу жөнөткөн.
Белгилей кетсек, Сулайман-Тоо — Оштун жана Кыргызстандын түштүгүнүн негизги тарыхый-маданий символдорунун бири. 2009-жылы тоо өзгөчө маданий жана руханий баалуулукка ээ объект катары ЮНЕСКОнун Бүткүл дүйнөлүк мурастар тизмесине киргизилген.
Буга чейин Ош шаарынын мэри Жанар Акаев ыйык Сулайман-Тоону ЮНЕСКОнун Бүткүл дүйнөлүк мурастар тизмесинен чыгарууну сунуштаганы белгилүү болгон.
