Джиган кызматкерлерин жана күзөтчүлөрүн 10 сааттай барымтада кармап, кийин аларга ок чыгарган
Орусиялык рэпер Джиган өзүнүн үйүндө кызматкерлерине карата ок атуу менен коштолгон окуя уюштурганы айтылууда. Окуя «Шато Соверен» коттедждик шаарчасындагы рэпердин үйүндө болгон. Жабыркагандар үй-бүлө башчысы өзүн башкара албай, «Сайга-9» карабинин алып, кызматкерлерди конок бөлмөсүнө чогултуп, аларга каршы өз алдынча жазалоо уюштурганын айтып беришкен. Бул тууралуу Astana TV Mash басылмасына шилтеме берип жазды.
Интернет-басылманын маалыматына ылайык, окуя 3-июлдан 4-июлга караган түнү болгон, бирок бул тууралуу маалымат азыр гана белгилүү болгон.
Джиган камуфляж кийип, «Сайга-9» карабини менен кызматкерлерди конок бөлмөсүнө чакырып, аларды ар кандай кылмыштарга айыптаган. Маселен, күзөтчүлөрдүн бирин педофилияга айыптап, карабиндин оозун анын башына такап, балдарды зордуктаганын моюнга алууну талап кылган. Эркек «ооба» деп жооп бергенден кийин, Джиган ага качууга беш секунд берген. Убакыт бүткөн соң ага ок атып, колуна жана бутуна тийгизген.
Башка кызматкерлерди болсо чыккынчылыкка, маалыматтарды сыртка чыгарууга, улутчулдукка жана башка иштерге айыптаган. Аларга да качып кетүүгө мүмкүнчүлүк берип, артынан ок чыгарган.
Окуянын жүрүшүндө, болжол менен 10 саат бою, Джигандын балдары шкафтарга жашынып, болуп жаткан окуялар тууралуу апасына билдирип турушкан.
Атылган окторду уккан кошуналар полицияга, шаарчанын күзөт кызматына жана Джигандын досторуна кабарлашкан. Бирок ал багынууну каалабай, аны тынчтандырууга аракет кылгандардын баарын сабаган. Шаарчадагы күзөтчүлөр курал-жарагы жок болгондуктан, үйгө кирүүгө батына алышкан эмес.
Жергиликтүү тургундардын айтымында, окуя тез эле жабылып калган. Акыры келген адамдардын биргелешкен аракетинин натыйжасында Джиганды кармап, тынчтандырышкан. Андан кийин ал Израилдеги кымбат реабилитациялык борборлордун бирине мажбурлап жөнөтүлгөнү жана азыркыга чейин ошол жерде экени айтылууда.
Балдарын апасы Оксана Самойлова карамагына алган. Ал Миландан Москвага шашылыш кайтып келген. Келгенден кийин өзүнүн жана балдарынын коопсуздугунан улам күзөтчүлөрдүн санын үч адамга чейин көбөйткөн.
Маалымат булагы: Astana TV
