Улуттук банктын мурдагы төрагасы Мелис Тургунбаев кармалды

Кыргызстандын Улуттук банкынын мурдагы төрагасы Мелис Тургунбаев кармалып, убактылуу кармоочу жайга киргизилди. Бул тууралуу Ички иштер министрлигиндеги булактар билдирди.

Алардын маалыматына ылайык, 25-мартта ИИМдин тергөө кызматы Мелис Тургунбаевди «Кыргызнефтегаз» ААКка байланыштуу иш боюнча күбө катары суракка чакырган. Тергөө иш-чараларынын жыйынтыгында ал кармалган.

Белгилеп кетсек, буга чейин Мелис Тургунбаев мунай-газ тармагында бир катар жетекчи кызматтарды ээлеп келген. Тактап айтканда, ал «Кыргызнефтегаз» ААКнын башкармалыгынын төрагасы жана директорлор кеңешинин төрагасы болгон.

Мындан тышкары, ал жаратылыш ресурстары, экология жана техникалык көзөмөл министри кызматын аркалап, кийин Улуттук банкты жетектеген.

Мелис Тургунбаевдин аты «Кыргызнефтегаздагы» мүмкүн болгон мыйзам бузуулар боюнча териштирүүнүн алкагында аталган болушу мүмкүн. Ал бул компанияда узак убакыт жетекчилик кызматтарда иштеген.

Бул факт боюнча укук коргоо органдары тарабынан расмий комментарийлер жарыяланган жок.