Адис айрым мөмө-жемиштерди рациондон чектөөгө чакырды

Узак жашоо боюнча эксперт Диего Суарес айрым мөмө-жемиштерди рациондон чектөөгө чакырды. Анын айтымында, алар ден соолукка терс таасир этиши мүмкүн. Бул тууралуу 20minutos басылмасы жазды.

Суарес бананды өзгөчө белгилеп, анын курамында фруктоза жана кант көп экенин айтты. «Бышкан бананда бир аш кашык Nutellaдагыдай эле кант бар», — деп эскертти эксперт. Ал ичи көөп, ашыкча салмагы бар жана дайыма чарчаган адамдарга бананды этият колдонууга кеңеш берди.

Мындан тышкары, адис мангону да этияттык менен колдонуу керектигин билдирди. Анын пикиринде, бул мөмө тропикалык аймактарда жашап, дайыма спорт менен машыккан адамдарга көбүрөөк ылайыктуу. Кыймылсыз жашоо образында манго организмдеги сезгенүү процесстерин күчөтүшү мүмкүн экенин белгиледи.

Ошондой эле Суарес жүзүмдү рациондо чектөөнү сунуштады. Анын айтымында, жүзүмдүн гликемиялык жүгү жогору болгондуктан, организм аны таттуу газдалган суусундук сыяктуу иштетет.

«Ал ачкачылыкты баспайт, тескерисинче, көз карандылыкты пайда кылат», — деп түшүндүрдү эксперт.