Бишкекте синтетикалык баңгизат таратууга шектелген жигит кармалды

Бишкекте баңгизат таратууга шектелген жаран кармалды. Бул тууралуу борбор калаанын милициясы билдирди.

Баңгизаттарды мыйзамсыз жүгүртүүгө каршы күрөшүү кызматы (БМЖККК) тарабынан «Допинг» ыкчам-алдын алуу иш-чарасы жүргүзүлүп, Биринчи май районунун аймагында баңгизаттарды жашыруун жайларга катып коюу жолу менен синтетикалык баңгизаттарды таратууга шектелген 2006-жылы туулган С.К. аттуу жаран колго түшүрүлгөн.

Аны жеке тинтүү учурунда ичиндеги заты белгисиз 56 түйүнчөк табылып, алынган. Мындан тышкары, ыкчам тергөө иш-чараларынын жүрүшүндө шектүү көрсөткөн жерлерден дагы ушундай эле 8 түйүнчөк табылган. Жалпысынан 64 түйүнчөк алынып, алардын салмагы 152 граммды түзгөн.

Аталган факт боюнча Кылмыш-жаза кодексинин 282-беренесинин (баңгизат каражаттарын, психотроптук заттарды жана алардын аналогдорун мыйзамсыз даярдоо, сактоо, ташуу же сатып өткөрүү) негизинде кылмыш иши козголду. Шектүү Бишкек милициясынын убактылуу кармоочу жайына киргизилди.

Учурда тергөө амалдары жүргүзүлүүдө.